ambegan dawa kapeksa dak sendhal
rinacik getun binundhel tembang pangudarasa
awit
esem rembulan kang gegojekan lawan mega iku
malah nanting eluh karanta-ranta
geneya,
kapanging ati kudu ginubet pedhut cintraka
wis dak pilah-pilah kabeh
samubarang jangkah
saiki, mengko, sesuk, lan emben
nganti ngegla kabeh bakal rinasa
nanging,
kidunging kencling wengi
kang ngarerujit iku
pratandha
katresnan kita kudu biru
1991-2003
Tidak ada komentar:
Posting Komentar